Snemma á mínum tónlistarferli velti ég því fyrir mér hvort lög mín væru bara heimilislausar eftirhermur á bandarískri djasstónlist og hvar Ísland væri í minni músík. Þessi misgáfulegi þanki hafði eitt gott í för með sér; ég fór að semja lög við ljóð. Þeim hefur fjölgað jafnt og þétt og það gerist æ oftar að ungt söngfólk leiti til mín eftir nótum að lögum mínum. Allnokkur er að finna yfirfarin í Djassbiblíu minni (2004) og í Mannabarnahefti okkars Gunnars Gunnarssonar (2014), en önnur voru aðeins til í útkrot uðum handritum. Þannig fæddist hugmyndin að þessari söngbók. Það var mitt happ að fá Aðalheiði Þorsteinsdóttur til að slá inn og leiðrétta í samráði við mig gömul og ný handrit, mörg með kaffiblett um. Gunnar Gunnarsson las yfir handritið og kom með glöggar athugasemdir. Nótnasjóður STEFs styrkti framtakið myndarlega og eins og á fyrri nótnabókum mínum prýðir forsíðuna teikning Ingólfs Margeirssonar. Ég vil þakka Aðalheiði Þorsteinsdóttur, Gunnari Gunnarssyni, Jóhönnu Jónasdóttur og Nótnasjóði STEFs fyrir framlag þeirra til bókarinnar. Þá vil ég þakka Ólafi Stolzenwald og Jóhanni Kristinssyni í Prentsmiðju GuðjónsÓ fyrir samstarfið. Lokaorðum formálans er beint til væntanlegra lesenda og notenda bókarinnar: Hér eru lögin í sinni nöktustu mynd og sjaldan skrifaðir inn sólókaflar eða lærðar útsetningar. Ef ykkur líst á lögin þá er það ykkar að útsetja eftir eigin höfði! Tómas R. Einarsson