Bókin hefur að geyma lög Jóhanns G. Jóhannssonar við ljóð Halldórs Laxness útsett fyrir söngrödd og píanó. Lögin eru flest samin á síðustu árum, það nýjasta sumarið 2014 en það elsta 1991. Öll hljómuðu þau á Stofutónleikum Gljúfrasteins haustið 2014 í flutningi Diddúar og Jóhanns, nokkur þeirra hafa verið sungin af kórum og söngkvartettum og sum hljómuðu fyrst á sviði Borgarleikhússins og Þjóðleikhússins þar sem Jóhann var um árabil tónlistarstjóri. Sönglögin eru aðgengileg og lagræn og falla vel að andblæ ljóðanna, en ljóðin sem leitað er fanga í eru: Atlantshafið, Bráðum kemur betri tíð, Fatahreinsararafsódían, Fornt ástaljóð enskt, Frændi þegar fiðlan þegir, Hallormsstaðaskógur, Nótt á tjarnarbrúnni, Stríðið og Þótt form þín hjúpi graflín.